Projekte inovative për Bujanocin nga Tirana

Kryetari i Komunës së Bujanocit, Arbër Pajaziti, i shoqëruar nga ndihmësi i tij Levent Qazimi dhe kryetari i Kuvendit Komunal, Driton Rexhepi, gjatë qëndrimit në Tiranë kanë zhvilluar një takim edhe me ministren e Ekonomisë dhe Inovacionit të Republikës së Shqipërisë, Delina Ibrahimaj.

Në fokus të takimit ishin mundësitë e bashkëpunimit dhe mbështetjes që ky dikaster dhe institucionet tjera të Shqipërisë mund të ofrojnë për komunën e Bujanocit dhe Luginën në përgjithësi.

Zhvillimi i resurseve në bujqësi dhe ndërmarrësi ishte njëra ndër temat kryesore të diskutimit, ndërsa një rëndësi e veçantë iu kushtua inovacionit dhe teknologjisë si perspektivë për të rinjtë e Luginës.

Pajaziti e njoftoi ministren Ibrahimaj se hapat e parë në këtë drejtim tashmë janë ndërmarrë përmes realizimit të një projekti me shkollat e mesme, në bashkëpunim me Unionin e Bashkive Shqiptare në Rajon dhe Ambasadën e Republikës së Shqipërisë në Beograd.

Gjatë takimit u diskutua edhe mbështetja për start-upet në fushën e teknologjisë informative dhe inovacionit, me theks të veçantë në krijimin e mundësive për të rinjtë profesionistë të Bujanocit që të zhvillojnë idetë dhe bizneset e tyre.

Po ashtu, si një hap me rëndësi të veçantë u përmend mundësia e hapjes së një qendre inovative në Bujanoc, ku të rinjtë pas trajnimeve profesionale do të mund të punojnë dhe krijojnë për tregun lokal dhe kompani ndërkombëtare.

Sipas Pajazitit, takime të tilla dëshmojnë se bashkëpunimi institucional me Tiranën zyrtare po merr dimensione konkrete në funksion të zhvillimit ekonomik dhe perspektivës së të rinjve të Luginës.