Deputeti shqiptar në Kuvendin e Serbisë, Shaip Kamberi, ka marrë pjesë në shënimin e 31-vjetorit të gjenocidit në Srebrenicë, organizuar në Prisht
Deputeti shqiptar në Kuvendin e Serbisë, Shaip Kamberi, ka marrë pjesë në shënimin e 31-vjetorit të gjenocidit në Srebrenicë, organizuar në Prishtinë, ku theksoi se kujtesa për viktimat është një detyrim moral dhe një përgjegjësi politike për mbrojtjen e së vërtetës.
Në fjalën e tij, Kamberi u shpreh se gjenocidi në Srebrenicë nuk ishte një akt i izoluar, por kulmi i një politike që, sipas tij, solli luftëra, spastrim etnik dhe krime masive në ish-Jugosllavi.
Ai kritikoi faktin se, edhe pas tri dekadash, Serbia, sipas tij, nuk është distancuar nga kjo politikë, duke përmendur mohimin e gjenocidit, relativizimin e vendimeve të gjykatave ndërkombëtare dhe glorifikimin e kriminelëve të luftës si pengesa për pajtimin, stabilitetin dhe perspektivën evropiane të rajonit.
Kamberi rikujtoi se, së bashku me deputetët e SDA Sanxhak, prej vitesh ka propozuar në Kuvendin e Serbisë një rezolutë për njohjen dhe dënimin e gjenocidit në Srebrenicë, por që, sipas tij, ajo nuk është futur asnjëherë në rend dite për debat.
Duke cituar edhe autoren Nevenka Tromp, ai theksoi se mohimi i krimeve mund të krijojë rrezik për përsëritjen e tyre, ndërsa nënvizoi se paqja e qëndrueshme në rajon mund të ndërtohet vetëm mbi pranimin e së vërtetës, drejtësinë dhe përgjegjësinë.
Në fund të fjalës së tij, Kamberi shprehu respekt për viktimat e Srebrenicës dhe solidaritet me familjet e tyre.
COMMENTS