BE e gatshme t’i ndihmojë Bujanocit

Në Bujanoc sot ka qëndruar shefi për Bashkëpunim i Delegacionit të BE-së, Nicola Bertolini, i cili është pritur nga kryetari i komunës, Nagip Arifi, me të cilin kanë biseduar rreth projekteve që janë realizuar dhe do të realizohen në të ardhmen nga fondet e BE-së.

Pas takimit, në një konferncë të përbashkët shtypi, kryetari Arifi potencoi se komuna e Bujanocit ka konkuruar në konkursin e Programit të BE-së për financimin e një pjese të projektit të Transfer Stacionit dhe se ka aplikuar së bashku me komunën e Likovës nga Maqedonia Veriore në IPA fondet për zhvillimin e turizmit.

Arifi theksoi se në të ardhmen rëndësi të veçantë do t’i kushtohet edhe projekteve të ekologjisë, që janë në fokus edhe të fondeve përafruese të BE-së.

„ Bashkëpunini ynë me BE-në ka rëndësi të posaçme për të mirën e komunitetit“, tha ndër të tjera Arifi.

Nga ana tjetër, Nikola Bertolini e cilësoi takimin  shumë të rëndësishëm pasi tha se është  njoftuar nga dora e parë rreth problemeve që ballafaqohen qytetarët e komunës së Bujanocit.

Ai tha se me Arifin kanë diskutuar asistencën që BE mund të jap në zgjidhjen e këtyre sfidave. Poashtu potencoi se është shumë i interesuar të gjejë zgjidhje për problemet ekologjike.

Bertolini u fokusua edhe tek fondet për të rinjtë për të cilat tha se komunat duhet t’i zhvillojnë kapacitetet në mënyrë që këto mjete të depërtojnë tek kjo pjesë e popullsisë.

„ I inkurajojmë vetqeverisjet lokale që të përqëndrohen në ngritjen e kapaciteteve të resurseve njerëzore, sidomos tek të rinjtë“, theksoi Bertolini.

Pas takimit, Arifi dhe Bertolini vizituan edhe deponinë e qytetit për të parë nga afër problemet me të cilat ajo po ballafaqohet.