Tekste falas për filloristët shqiptarë tê Luginës

Në ditën e parë të vitit të ri shkollor, nxënësit shqiptarë të Luginës së Preshevës u pajisën me shpërndarjen falas të teksteve mësimore në gjuhën shqipe, një mbështetje që edhe këtë vit sigurohet nga Qeveria e Kosovës në bashkëpunim me Këshillin Kombëtar Shqiptar (KKSH).

Kryetari i KKSH-së, Enver Rexhepi, së bashku me bashkëpunëtorët, vizitoi çerdhen “8 Marsi” në Preshevë, ku fëmijëve e edukatorëve iu uruan fillimi i vitit të ri shkollor. Vizitat vazhduan në shkollën fillore “Prof. Ibrahim Kelmendi” në Preshevë dhe në shkollën “Naim Frashëri” në Bujanoc, ku u shpërndanë tekstet për nxënësit.

Atmosfera, sipas Rexhepit, ishte e mbushur me gëzim dhe entuziazëm, ndërsa mësuesit dhe drejtuesit e shkollave shprehën mirënjohjen për këtë mbështetje të çmuar.

“Edhe këtë vit, librat për nxënësit shqiptarë në Luginë të Preshevës financohen nga Qeveria e Republikës së Kosovës, në bashkëpunim me Këshillin Kombëtar Shqiptar. Kjo ndihmë është simbol i lidhjes së fortë kombëtare mes Kosovës dhe Luginës”, u shpreh Rexhepi.

Ai falënderoi veçanërisht Qeverinë e Kosovës për përkushtimin e saj të vazhdueshëm ndaj arsimit në gjuhën shqipe dhe kujdesin për fëmijët shqiptarë të Luginës.

Në fund, kryetari i KKSH-së uroi të gjithë nxënësit dhe mësuesit një vit të mbarë shkollor, të mbushur me dije, suksese dhe arritje.