Shqipëria edhe me një projekt në Bujanoc

Kryetari i Komunës së Bujanocit, Arbër Pajaziti, ka njoftuar se sot ka nisur zbatimi i një projekti inovativ, i mbështetur nga Unioni i Bashkive Shqiptare në Rajon dhe nën monitorimin e Ambasadës së Republikës së Shqipërisë në Serbi.

Me këtë rast, Pajaziti, së bashku me drejtoreshën e Unionit të Bashkive Shqiptare në Rajon,  Andriola Kambo, si dhe Ambasadorin e Republikës së Shqipërisë në Serbi, Sh.T. Bardhyl Canaj, kanë vizituar Shkollën e Mesme “Sezai Surroi” në Bujanoc. Para nxënësve dhe stafit arsimor është shpalosur qëllimi dhe rëndësia e projektit, duke u theksuar se kjo nismë tashmë ka kaluar nga faza e idesë në zbatim konkret në terren.

Sipas kryetarit Pajaziti, projekti synon t’u ofrojë të rinjve të Bujanocit njohuri dhe aftësi të domosdoshme për të tashmen dhe të ardhmen, veçanërisht në fushën e dijeve digjitale dhe programimit. Ai ka theksuar se tregu i punës po ndryshon me shpejtësi dhe kërkon aftësi praktike, kreativitet dhe gatishmëri për të mësuar vazhdimisht, elemente që ky projekt synon t’i zhvillojë përmes trajnimeve konkrete dhe të aplikueshme.

Pajaziti ka ritheksuar se Komuna e Bujanocit mbetet e përkushtuar ndaj rinisë dhe krijimit të kushteve që të rinjtë të zhvillohen dhe ta ndërtojnë të ardhmen e tyre në vendlindje. Sipas tij, investimi në rini është investimi më i sigurt për të ardhmen e komunës dhe për zhvillimin e qëndrueshëm të shoqërisë.

Në fund, kryetari i ka ftuar të rinjtë që ta shfrytëzojnë këtë mundësi, të angazhohen aktivisht në trajnimet e ofruara dhe të mos hezitojnë të mësojnë e të provojnë gjëra të reja, duke i siguruar se institucionet lokale do të jenë pranë tyre gjatë gjithë këtij procesi.