Kamberi takohet me komunitetin shqiptar në Dallas

Deputeti Shaip Kamberi ka zhvilluar një takim me pjesëtarë të komunitetit shqiptar në Dallas, me të cilët ka biseduar për mënyrat e forcimit të bashkëpunimit dhe kontributit të diasporës për Luginën e Preshevës.

“Dje pata kënaqësinë të takohem me pjesëtarë të komunitetit shqiptar këtu në Dallas – njerëz punëtorë, të mirëorganizuar dhe të përkushtuar, që me punën dhe sukseset e tyre nderojnë kombin kudo që jetojnë”, ka shkruar Kamberi.

Ai ka theksuar se ky komunitet është shembull i integrimit pa humbur identitetin dhe i solidaritetit që nuk njeh kufij.

Në takimet e zhvilluara, janë ndarë ide për përfshirjen e diasporës në ndërkombëtarizimin dhe avokimin e çështjes së Luginës, si dhe në promovimin e të drejtave dhe dinjitetit të shqiptarëve në këtë rajon.

Deputeti Kamberi ka falënderuar për mikpritjen tradicionale shqiptare dhe për përkushtimin e komunitetit në mbështetje të iniciativave që lidhen me të ardhmen e Luginës së Preshevës.