Deputeti Shaip Kamberi, shoqëruar nga Ragmi Mustafi dhe Ragmi Mustafa, ka marrë pjesë në një ngjarje të organizuar nga Albanian-American Civic Lea
Deputeti Shaip Kamberi, shoqëruar nga Ragmi Mustafi dhe Ragmi Mustafa, ka marrë pjesë në një ngjarje të organizuar nga Albanian-American Civic League në New York, ku kanë qenë të pranishëm personalitete të njohura të politikës amerikane dhe të komunitetit shqiptar në SHBA.
Në mesin e të ftuarve kanë qenë Senatori Cory Booker, ish-kongresmeni Joe DioGuardi me bashkëshorten Shirley Cloyes DioGuardi, kandidati për Kongresin amerikan Diamant Hysenaj, si dhe përfaqësues të njohur të diasporës shqiptare si Faton Bislimi, Agim Alickaj, Behlul Gashi e të tjerë.
Në këtë event, Kamberi është drejtuar me një fjalim para audiencës, ku ka folur për pozitën e shqiptarëve në Luginën e Preshevës, diskriminimin institucional, standardet e dyfishta të Beogradit dhe rëndësinë e rolit të Shteteve të Bashkuara të Amerikës në mbështetje të paqes dhe demokracisë në Ballkan.
Ky ishte fjalimi i plotë i Shaip Kamberit në New York:
I dashur Congressmen DioGuardi
E dashura Sherlly,
Fort i respektuar Senator Booker,
Të nderuar anëtarë të Bordit Të Albanian-American Civil League
të nderuar miq të pranishëm,
është kënaqësi dhe nder të jem sot me ju për të ndarë disa shqetësime dhe shpresa që lidhen me pozitën e shqiptarëve në Luginën e Preshevës dhe me zhvillimet e përgjithshme në Ballkanin Perëndimor.
Shqiptarët në Luginën e Preshevës prej dekadash përballen me diskriminim sistematik politik, ekonomik e institucional. Në vend që të trajtohemi si qytetarë të barabartë, për ne vazhdojnë të mungojnë të drejtat themelore në arsim, përdorim të gjuhës, përfaqësim në institucione dhe zhvillim ekonomik.
Serbia, e cila paraqitet si kandidate për anëtarësim në Bashkimin Evropian, në praktikë e trajton minoritetin shqiptar me standarde të tjera nga ato që kërkon për pakicën serbe në Kosovë. Ajo mohon krimet e luftës dhe glorifikon kriminelët e dënuar në Hagë. Një qasje e këtillë mohuese jo vetëm që është pengesë e pajtimit mes popujve në Ballkan, por ajo përfaqëson një kundërshtim të vlerave të demokracisë liberale dhe mban gjallë arsyen hegjemoniste serbe.
Ky është thelbi i një politike të standardeve të dyfishta: Beogradi kërkon autonomi politike, garanci kushtetuese e mbrojtje ndërkombëtare për serbët në Kosovë por nuk pranon as të diskutojë për të drejtat elementare të shqiptarëve brenda kufijve të vet.
Kjo qasje jo vetëm që dëmton parimin e barazisë, por ushqen tensione dhe mosbesim ndërmjet komuniteteve.
Më shqetësuese është se kjo politikë është pjesë e një vizioni më të gjerë që quhet “Bota serbe”, një projekt që synon të riprodhojë ndikimin politik e kombëtar të Serbisë mbi popullsitë serbe jashtë kufijve të saj. Ky projekt, që ka ngjashmëri të rrezikshme me idetë e “botës ruse”, përbën kërcënim real për stabilitetin rajonal.
Pikërisht për këtë, roli i Shteteve të Bashkuara mbetet thelbësor. Pa angazhimin e qartë dhe të balancuar amerikan, rajoni mund të rrëshqasë në sfera të ndikimit që nuk ndajnë vlerat demokratike perëndimore.
Prandaj ne kërkojmë që SHBA të përdorë zërin dhe ndikimin e saj për të nxitur Serbinë të respektojë të drejtat e pakicave jo vetëm në fjalë, por në praktikë, dhe që zgjidhja e çështjeve të hapura në Ballkan të bazohet në parimin e reciprocitetit, të drejtës dhe të barazisë.
Zëri juaj, senator Booker, dhe përkrahja e miqve të SHBA-së për të drejtat e barabarta të shqiptarëve në Luginë të Preshevës do të ishte një sinjal i fuqishëm se demokracia dhe drejtësia nuk kanë kufij.
Faleminderit.
COMMENTS