Trupi Koordinues dhe KKSH nënshkruajnë marrëveshje për projektin “Zërat e Traditës”

Në Bujanoc është nënshkruar marrëveshja ndërmjet Trupit Koordinues për Preshevë, Bujanoc dhe Medvegjë dhe Këshillit Kombëtar Shqiptar për realizimin e projektit “Zërat e Traditës”, i cili do të financohet me 800 mijë dinarë.

Sipas Trupit Koordinues, projekti synon ruajtjen dhe promovimin e trashëgimisë kulturore, ndërsa gjatë takimit ndërmjet ushtruesit të detyrës së drejtorit të Shërbimit të Trupit Koordinues, Nenad Mitroviq, dhe kryetarit të KKSH-së, Enkel Rexhepi, u diskutuan edhe tema të tjera me interes për shqiptarët në Preshevë, Bujanoc dhe Medvegjë.

Në fokus të bisedimeve ishin fushata informuese për pasivizimin e adresave, zbatimi i Planit Shtatëpikësh, përfaqësimi i shqiptarëve në institucionet shtetërore, sigurimi i teksteve shkollore në gjuhën shqipe dhe bashkëpunimi institucional.

Nga ana tjetër, kryetari i KKSH-së, Enkel Rexhepi, bëri të ditur se projekti “Zërat e Traditës” do të dokumentojë dhe promovojë kulturën, traditat dhe zakonet e shqiptarëve, me theks të veçantë në rolin dhe kontributin e gruas shqiptare në ruajtjen e trashëgimisë kulturore.

Rexhepi theksoi se, pavarësisht bashkëpunimit për realizimin e këtij projekti, qëndrimi i Këshillit Kombëtar Shqiptar ndaj Qeverisë së Serbisë mbetet i pandryshuar. Ai tha se KKSH-ja do të vazhdojë të kërkojë zbatimin e marrëveshjeve me faktorin politik shqiptar, të ngrejë çështjet që lidhen me diskriminimin dhe shkeljen e të drejtave të shqiptarëve, si dhe të kërkojë trajtim të barabartë dhe respektim të standardeve evropiane për të drejtat e njeriut dhe të pakicave.