Rregullimi i rrjetit elektrik për Lluçanin dhe Letovicën – Lajm i mirë për banorët!

Kryetari i Komunës së Bujanocit, Arbër Pajaziti, ka njoftuar sot për një zhvillim pozitiv që prek drejtpërdrejt jetën e banorëve të fshatrave Lluçan dhe Letovicë. Pas shumë kërkesave të banorëve dhe bashkëpunimit të ngushtë me Elektrodistribucionin, është marrë vendimi për rregullimin e rrjetit elektrik në këto dy vendbanime.

Ky vendim vjen pas një periudhe me probleme të vazhdueshme në furnizimin me energji elektrike, që ka shkaktuar vështirësi në jetën e përditshme të banorëve. Megjithatë, sipas kryetarit Pajaziti, problemi do të marrë fund shumë shpejt, pasi do të ndërrohet një pjesë e konsiderueshme e rrjetit ekzistues.

“Pas realizimit të këtyre punimeve, banorët nuk do të përballen më me ndërprerje të energjisë”, tha ai, duke theksuar se kjo ka qenë kërkesa më e rëndësishme që kanë paraqitur banorët e këtyre dy fshatrave.

Ky investim pritet të sjellë përmirësime të ndjeshme në cilësinë e jetës për banorët dhe është një shembull konkret i bashkëpunimit efektiv mes institucioneve dhe komunitetit lokal.