Qazimi: KKSH për të gjithë, jo për interesa partiake!

Bartësi i listës së Alternativës për Ndryshim (APN) në zgjedhjet për Këshillin Kombëtar Shqiptar (KKSH), Levent Qazimi, ka bërë thirrje për një qeverisje gjithëpërfshirëse të këtij institucioni, duke theksuar se interesat e shqiptarëve duhet të jenë mbi ato partiake.

Në një reagim pas zgjedhjeve, Qazimi ka ritheksuar qëndrimin se vullneti i votuesve dhe parimi i fituesit të zgjedhjeve duhet të respektohen në procesin e konstituimit të përbërjes së re të KKSH-së.

Ai është shprehur për një institucion ku bashkëpunimi politik dhe profesionalizmi të kenë përparësi ndaj interesave partiake, ndërsa fryma e bashkimit e dëshmuar në zgjedhjet parlamentare të vazhdojë edhe në këtë proces.

Qazimi ka vlerësuar gjithashtu rëndësinë e mbështetjes së Kosovës dhe Shqipërisë, si dhe të bashkëpunimit me institucionet shtetërore dhe faktorin ndërkombëtar.

Sipas tij, KKSH-ja nuk duhet të shndërrohet në institucion për ndarjen e posteve, por duhet të përqendrohet në mbrojtjen e identitetit kombëtar, avancimin e të drejtave dhe përfaqësimin dinjitoz të shqiptarëve.

“Mbi partitë duhet të jetë interesi i shqiptarëve!”, ka përfunduar Qazimi.