(Mos)konstituimi i kuvendit nê Preshevë, reagon Memeti

Lidhur me ndërprerjen e seancës konstituive në Preshevë ka reaguar kryetari i Alternativês për Ndryshim, Visar Memeti.

Ndër tê tjera, koalicionin PVD-PDSH e ka quajtur tê interesave personale të dyshes Sinani-Mustafa.

Postimi i Memetit:

Një pushtet i imponuar i interesave personalo-klanore

Pas pesë javëve negociata, duke e kthyer komunën e Preshevës në mjet pazari për interesa të tyre, Ragmiu dhe Ardita nënshkruan një marrëveshje, e cila as sot në seancën e parë të konstituimit, nuk arriti të respektohet plotësisht.

Sot, në ditën e fundit kur përfundon afati ligjor për formimin e qeverisjes së re në Komunën e Preshevës, në seancën e ftuar nga kryetari i Organit të përkohshëm, koalicioni i interesave personale dhe klanore PVD – PDSH, vetëm dy ditë pas zyrtarizimit të marrëveshjes, DËSHTOI në zgjedhjen e kryesisë së Kuvendit – Kryetarit dhe Zëvendëskryetarit.

Ky dështim i zgjedhjes së Kryesisë së Kuvendit, e rrezikon lartë që komunën e Preshevës ta dërgoj në zgjedhje të parakohshme SËRISH. Pra përveç se një tandem i imponuar dhe i brishtë është edhe destabilizues, sepse si parim bazë kanë vetëm interesat personale dhe klanore e asesi interesin e qytetarëve.

Kjo mendësi e vërtetuar dhe në zgjedhjet e dy qershorit në Luginë, ku ky pushtet i imponuar shkeli çdo parim demokratik në garën e zgjedhjeve lokale. PVD me ndihmën e Qeverisë Kosovës përmes blerjes brutale të votave, e në anën tjetër PDSH me asfallt dhe punime në teren pa asnjë bazë ligjore ku të gjithë punimet ishin vetëm për vota dhe ishin jolegjitime.

Ky tandem imponues e pa identitet, e ka dëshmuar edhe se kompromisin mbi kurriz të qytetarëve për pak pushtet e për pozita nuk e kanë të vështire, duke bashkëqeverisur edhe në Organin e Përkohshëm të instaluar dhunshëm nga Beogradi në mes të natës.

ALTERNATIVA për Ndryshim, mbetet e përkushtuar në ruajten dhe mbrojtje e çdo parimi të saj me të cilën i hodhi themlet e para. Ndërsa Preshevës i ka shërbyer edhe në pushtet ashtu siç do t’i shërbejë edhe si një opozitë e fortë dhe një zë i fuqishëm kundër çdokujt që cenon dinjitetin e shqiptarëve në Luginë.