Bujanoci qendër e bletarisë

Bletarë nga të gjitha pjesët e Serbisë por edhe nga Kosova dhe Maqedonia po marrin pjesë sot në Panairin e 9-të ndërkombëtar, me moton “Bletët nuk njohin kufij” i cili po mbahet në Bujanoc.

Ata kanë ekspozuar produktet e tyre në rreth 50 stande në palestrën e sporteve të këtij qyteti.

Panairin e shpalli të hapur kryetari i komunës, Arbër Pajaziti.

Ky është fjalimi i tij:

Të nderuar bletarë, të dashur mysafirë, zonja dhe zotërinj,

Me kënaqësi të veçantë ju përshëndes dhe ju uroj mirëseardhjen në Panairin e 9-të Ndërkombëtar të Bletarisë në Bujanoc. Ky panair tashmë është bërë një pikë e rëndësishme takimi për bletarët nga të gjitha rajonet dhe shtetet përreth, duke shërbyer si një urë bashkëpunimi dhe shkëmbimi përvojash.

Bletaria nuk është vetëm një zanat apo burim të ardhurash, por edhe një mision fisnik në ruajtjen e ekosistemit dhe biodiversitetit. Sot, më shumë se kurrë, është e rëndësishme që të punojmë së bashku për të forcuar këtë sektor dhe për të krijuar mundësi të reja për plasimin e produkteve tuaja në tregje më të gjera.

Komuna e Bujanocit mbetet e përkushtuar për të mbështetur bletarët dhe për të krijuar kushte më të mira për zhvillimin e këtij sektori. Ne do të vazhdojmë të jemi pranë jush me iniciativa që ndihmojnë zhvillimin dhe promovimin e produkteve të bletarisë.

Ju uroj suksese dhe bashkëpunim të ndërsjellë që do të sjellin përfitime për të gjithë. Panairi le të jetë një hap përpara në zhvillimin dhe afirmimin e bletarisë si një sektor me potencial të jashtëzakonshëm.

Ju faleminderit dhe suksese!