Pajaziti: Një babagjysh i keq

Kryetari i Alternativës për Ndryshim në Bujanoc, Arbër Pajaziti, ka reaguar ndaj postimit te fundit të kryetarit të KKSH, Ragmi Mustafi.

Postimi i Pajazitit:

Një babagjysh i keq

Aq bukur i thur fjalitë, sa që mes fjalësh përshkruan vetveten. Nga gabimi që bëri, veçse të distancohet e të kërkojë falje, ai nxitë e propagandon mes shqiptarësh se të gjithë ata të pakënaqurit e akteve të tij keqpërdoruese e keqmenaxhuese, janë sejmenë të progresistëve të Serbisë.

Ky nuk e kupton as vetveten! Ai vuan nga viktimizimi, e shpesh tregon se papërmbajtshmërinë e ka ves të keq.

Tani, populli e dinë, dhe po flet për figurën e tij përçarëse, keqmenaxhuese, keqpërdoruese, shantazhuese e propaganduese. Është bërë simbol i ditëve të festave të fundvitit. Jo si një babagjysh i mirë që sjell dhurata, por si një babagjysh i keq, që destinon dhuratat e popullit tek një grupacion, që favorizon dhe brohoret për të. Edhe kur e dinë që e ka gabim!

Vërtetë nga një këndvështrim tjetër, është e padrejtë që populli t’ia vë gishtin vetëm babagjyshit të keq, sepse ai ka vepruar siç kanë bërë ndërvite paraardhësit e tij. Siç fshihet pas perdeve, babagjyshi tjetër, që në pikë të pandemisë, dinte aq mirë të fshihej pas blerjes së një autoambulance, me ndihmat për popullit, duke e bërë si një dhuratë për të. Në fakt mes veprës së tij, thurte aq bukur edhe ai, vjedhje të dukshme të ndihmave.

Po, a vidhet në ndihma?

Çmendurisë i është vënë kapaku. Partia për Veprim Demagogjik, ashtu siç njihet në popullin tonë të përvuajtur, të diskriminuar, e shkelur, ka ditur gjithnjë të viktimizohet prapa hajnisë, keqpërdorimit e keqmenaxhimit të parasë publike. Të veshur nën petkun e patriotizmit, që veç për patriotë s’janë shquar, mashtronin e gënjenin edhe për qindarkën e fundit, të destinuar për popullin.

Kanë vjedhur shumë! Aq shumë saqë sot, po me ato para dëshirojnë ta shuajnë zërin kritik. E po qe se i kundërshton, vishesh nën petkun e sejmenëve të Vuçiqit. Gjersa, bashkëpunëtorët më të mirë, e më besnikë të këtij të fundit, janë ata që mes shqiptarësh, denigrojnë e varfërojnë.

Në fund të fundit, besoj se fuqia e një politikani nuk janë paratë, është populli. Po qe se një politikan humbet pëlqimin në popull, edhe po ta kishte pasurinë e tërë botës nuk e rikthen veten aty ku ishte.p