“Dosja-Zgjedhjet në Tërrnoc”: Gjykata mund të vendos deri më 21.05, ora 9:55 ( dokument)

Gjykata Administrative akoma nuk ka vendosur lidhur me ankesën e Koalicionit të Shqiptarëve të Luginës ndaj vendimit të Komisionit Republikan Zgjedhur për anulimin e zgjedhjeve në Tërrnoc.

Në përgjigjen me shkrim të zëdhënses së kësaj gjykate, Millka Murganiq, pas kërkesës së FOLonline, thuhet se “ankesën e KSHL-së me anë të postës e kanë pranuar më 17.05.2022, kurse përgjigjen dhe dosjen tjetër nga ana e KRZ-së e kanë pranuar më 18.05.2022, në ora 09:55”.

Zëdhënsja e gjykatës rikujton se në bazë të Ligjit, vendimi ndaj ankesës së KSHL-së do të pasojë më së voni deri në 72 orë nga pranimi i ankesës si dhe materialeve tjera në rastin e kësaj lënde.

Duke llogaritur kohën e pranimit të materialeve nga ana e KRZ-së, i bie se vendimi lidhur me ankesën në fjalë mund të pasojë më së voni deri më 21.05.2022, në ora 09:55.

Kujtojmë se deri më tash në çështjen e rivotimit në vendvotimin nr.6 në Tërrnoc, të datës 28 prill, janë sjell dy vendime të ndryshme.

Fillimisht, Komisioni Komunal Zgjedhor i Bujanocit ka refuzuar ankesën e Partisë Socialiste të Serbisë për anulimin e zgjedhjeve dhe përsëritjen e tyre.

Më pas, Komisioni Republikan Zgjedhor, si shkallë e dytë, ka pranuar ankesën e SPS-it duke anuluar zgjedhjet në fjalë.

Të pakënaqur ndaj këtij vendimi, Koalicioni i Shqiptarëve të Luginës i ka paraqitur ankesë Gjykatës Administrative duke kërkuar anulimin e tij.

Vendimi i Gjykatës Administrative është përfundimtar kur është në pyetje procesi zgjedhor.

Zëdhënësja e kësaj gjykate i ka thënë FOLonline se vendimi do të publikohet në veb faqen e këtij organi.