Mitroviq dhe Berisha bisedojnë për të drejtat e pakicave dhe projektet infrastrukturore prioritare

Ushtruesi i detyrës së drejtorit të Shërbimit të Trupit Koordinues të Qeverisë së Serbisë për Preshevë, Bujanoc dhe Medvegjë, Nenad Mitroviq, zhvilloi një takim me ministrin për të Drejtat e Njeriut, të Pakicave dhe Dialogun Shoqëror, Demo Berisha, ku u diskutua për avancimin e të drejtave të pakicave kombëtare, bashkëpunimin ndërinstitucional dhe realizimin e projekteve prioritare zhvillimore.

Gjatë takimit, Mitroviq e njoftoi ministrin me fushatën informuese për pasivizimin e adresave, të cilën Shërbimi i Trupit Koordinues po e zbaton në kuadër të Planit të Veprimit për realizimin e të drejtave të pakicave kombëtare për periudhën 2026–2029.

Ai e informoi gjithashtu ministrin për rezultatet e takimit të zhvilluar me kryetarin e Këshillit Kombëtar Shqiptar, Enkel Rexhepi, gjatë të cilit u paraqitën kërkesat e këtij institucioni. Mitroviq kërkoi mbështetjen e ministrit për organizimin e një takimi të përbashkët mes Ministrisë, Trupit Koordinues dhe Këshillit Kombëtar Shqiptar, me qëllim shqyrtimin e çështjeve të hapura dhe përcaktimin e hapave të mëtejshëm për zgjidhjen e tyre.

Një pjesë e veçantë e bisedës iu kushtua projekteve infrastrukturore në Preshevë. Mitroviq theksoi nevojën për përshpejtimin e realizimit të projekteve jetike për funksionimin e komunitetit lokal, përmirësimin e cilësisë së jetës së qytetarëve dhe zhvillimin ekonomik e shoqëror të komunës, duke kërkuar mbështetjen e ministrit në koordinimin me institucionet përkatëse shtetërore.

Nga ana e tij, ministri Berisha vlerësoi rëndësinë e bashkëpunimit të vazhdueshëm mes institucioneve republikane, Trupit Koordinues dhe përfaqësuesve të Këshillit Kombëtar Shqiptar, duke theksuar se dialogu i hapur është kyç për zgjidhjen e çështjeve me interes për qytetarët dhe për përmirësimin e marrëdhënieve ndëretnike.

Sipas njoftimit, bashkëbiseduesit u pajtuan të vazhdojnë komunikimin e rregullt dhe aktivitetet e përbashkëta për adresimin e çështjeve me rëndësi për komunat e Preshevës, Bujanocit dhe Medvegjës.

Burimi: Shërbimi i Trupit Koordinues.