FJALA E REDAKTORIT: Diplomati i heshtur

Pse ka më shumë Shqipëri në Luginë?

Dy të rinj nga Lugina, Edini dhe Besari, këtë verë zgjodhën një gjest të thjeshtë, por me peshë të madhe simbolike: i dorëzuan një mirënjohje Ambasadorit të Shqipërisë në Beograd, Sh.T.. Bardhyl Canaj.
“Bashkë me Besarin, ia dhuruam një dhuratë simbolike për kontributin e çmuar Ambasadorit. Unë përfundova me sukses vitin e parë në Elbasan, ndërsa Besari vitin e dytë në Gjirokastër, dhe shkollimin e lartë po e kryejmë pa kosto financiare. Shqipëri ❤️” – shkroi Edini në rrjete sociale.

Ky falënderim nuk është thjesht një akt personal. Është një pasqyrë e një realiteti të ri: Shqipëria është më pranë Luginës. Dhe në këtë afrim të ndjeshëm, figura e Ambasadorit Bardhyl Canaj zë një vend qendror.

Që nga dita kur mori detyrën në Beograd, ka më shumë Shqipëri në Luginë: jo nëpër letra, por në realitet. Në fjalë të mbajtura e premtime të përmbushura. Në terren, aty ku duhet të jetë përfaqësuesi i shtetit amë.

Ambasadori Canaj nuk njeh distanca. Rruga prej 800 kilometrash vajtje-ardhje nuk është pengesë për të, por përditshmëri e një misioni që e merr me seriozitet dhe zemër. Ai është aty: në çdo event kulturor, sportiv, arsimor, ekonomik, social. Jo për protokoll, por për praninë që u jep shqiptarëve ndjesinë se nuk janë më të harruar.

Ai nuk bën dallime politike. Për të, të gjithë shqiptarët janë të barabartë, janë vëllezërit e tij. Kjo qasje bashkuese, larg interesave partiake, është një shembull i rrallë në një hapësirë shpesh të përçarë.

Në fushën e arsimit, ndikimi i tij është i prekshëm: më shumë kuota për studentët nga Lugina në universitetet e Shqipërisë, më shumë mbështetje për të rinjtë që kërkojnë dije dhe më shumë perspektivë për familjet që dikur ndiheshin të harruara.

Z. Canaj po sjell në Luginë personalitete nga më të spikaturit e jetës publike shqiptare, dhe njëkohësisht po i hap rrugë të rinjve luginas që të jenë më të pranishëm në Shqipëri: në institucione, në kulturë, në arsim e në vendimmarrje.

Koordinimi i tij me Ministrinë për Evropën dhe Punët e Jashtme është model. Ai nuk kërkon vëmendje mediatike, por rezultat konkret. Nuk flet shumë, por bën shumë. Prandaj edhe quhet me plot të drejtë diplomati i heshtur, që flet me vepra.FJALA E REDAKTORIT: Diplomati i heshtur.