KOMUNIKATË E PARTISË DEMOKRATIKE RRETH PROCESIT ZGJEDHOR DHE REZULTATIT TË ZGJEDHJEVE LOKALE Të dashur anëtarë dhe përkrahës të Partisë Demokra
KOMUNIKATË E PARTISË DEMOKRATIKE RRETH PROCESIT ZGJEDHOR DHE REZULTATIT TË ZGJEDHJEVE LOKALE
Të dashur anëtarë dhe përkrahës të Partisë Demokratike,
Pas përfundimit të zgjedheve lokale të mbajtura më 2 qershor 2024, si dhe pas çertifikimit të rezultateve më datë 28 qershor 2024 dhe ndarjes së mandateve më datë 1 korrik 2024, Partia Demokratike lëshon këtë komunikatë për të vlerësuar rezultatin e arritur dhe procesin zgjedhor në përgjithësi.
Në zgjedhjet e fundit lokale nga numri i përgjithshëm i qytetarëve me të drejtë vote prej 43.081, në këtë proces të drejtën për të shprehur vullnetin e votës e shfrytëzuan 18.826 persona, apo 43.70%. Krahasuar me zgjedhjet lokale të vitit 2020, dalja e shqiptarëve në këto zgjedhje është rreth 2000 persona më pak.
Nga kjo shihet qartë që procesi i pasivizimit të adresave të shqiptarëve ka ndikuar dukshëm në uljen e numrit të votuesve shqiptarë.
Partia Demokratike në këto zgjedhje ka marrë 2508 vota, apo 13.32% dhe ka siguruar 6 mandate në Kuvendin Komunal të Bujanocit.
Edhe pse jemi të zhgënjyer me rezultatin që kemi arritur, e vlerësojmë përkushtimin dhe angazhimin e secilit anëtar, aktivist e mbështetës të Partisë Demokratike, dhe i falemnderojmë për besimin e dhënë. Zgjedhjet janë moment ku qytetarët shprehin vullnetin dhe preferencat e tyre dhe ne respektojmë vendimet e marra në kutitë e votimit.
Partia Demokratike gjatë fushatës zgjedhore është përpjekur për të prezentuar programin e saj, për të adresuar nevojat dhe shqetësimet e qytetarëve dhe për të ofruar vizionin për të ardhmen e komunës së Bujanocit. Përkundër rezultatit të pakënaqëshëm, PD është e vendosur të vazhdojë të punojë me përkushtim për të përmbushur qëllimet për mirëqenie dhe përparim të komunës sonë.
Në frymën e bashkëpunimit me partitë politike shqiptare, dhe të ndërgjegjshëm për historinë tonë kombëtare e njëherit dhe për stabilitetin, seriozitetin e situatës dhe zhvillimin e komunës së Bujanocit, Partia Demokratike angazhohet për ndërtimin e një shumice shqiptare në mandatin e ri 2024 – 2028.
Do të vazhdojmë të dëgjojmë dhe përfaqësojmë interesat e qytetarëve tanë, duke iu përgjigjur sfidave dhe mundësive që vijnë.
I falemnderojmë të gjithë përkrahësit tanë për besimin e vazhdueshëm dhe angazhimin që së bashku të ecim përpara deri në përmbushjen e vizonit tonë për një të ardhme më të mirë për të gjithë.
Partia Demokratike
01.07.2024
COMMENTS