Vazhdojnë dënimet për vendosjen e flamurit kombëtar, në shënjestër APN

Gjykata për Kundërvajtje në Vranjë ka vazhduar me shqiptimin e dënimeve për shkak të vendosjes së flamurit kombëtar.

Kësaj here një të tillë ka pranuar Alternativa për Ndryshim dhe ish kryetari i saj Shqiprim Arifi, lidhur me vendosjen e flamurit në selinë e degës së këtij subjekti politik në Bujanoc me rastin e 28 nëntorit të vitit të kaluar.

Postimi i Arifit lidhur me rastin:

Deri kur?

55.000 dinarë dënim për vendosjen e Flamurit Kombëtar Shqiptar 🇦🇱

Sot kam pranuar dënimin prej 55.000 dinarë nga Gjykata për Kundërvajtje në Vranjë lidhur me vendosjen e flamurit kombëtar në selinë e Alternativës për Ndryshim — dega Bujanoc, me rastin e festës së 28 nëntorit, ditës së Flamurit.

Gjykata në fjalë ka nxjerrur AKTVENDIM lidhur me vendosjen e flamurit kombëtar shqiptar në selinë e partisë tonë në Bujanoc, me ç’rast ky dënim përbëhet prej 5000 dinarëve ndaj mua si person përgjegjës në pozitën e kryetarit të partisë “Alternativa për Ndryshim”, ndërkaq 50.000 dinarë për subjektin politik që kam drejtuar deri në shkurt të këtij viti, kur është datuar edhe ky aktvendim.

Ky aktvendim është pjesë e kolazhit diskriminues dhe shkeljeve të drejtave sistematike individuale, kolektive të shqiptarëve në Luginën e Preshevës.

Derisa përgatitjet e Qeverisë së Republikës së Kosovës janë në fazën finale për themelimin e ashtuquajturës “Asociacioni i komunave me shumicë serbe — Zajednica” me kompetenca të plota ekzekutive, shqiptarëve në Luginën e Preshevës i mohohen të drejtat elementare njerëzore siç është vendosja flamurit kombëtar.

Hapat e regresit të drejtave e minoritetit shqiptar në Serbi kanë një funksion divergjence me të drejtat e minoriteve serbe në Republikën e Kosovës.

Sa më shumë të drejta për serbet në Kosovë aq më pak të drejta për shqiptarët në Serbi. Deri kur?