Mustafi: Ja çka ka pikatur raporti i Progresit për Serbinë kur janë në pyetje shqiptarët e Luginës

Kryetari i Degës së PVD-së në Bujanoc, Ragmi Mustafi, i cili është edhe këshilltar politik i zv/kryeministrit kosovar, Besnik Bislimi, ka zbardhur sot disa pjesë të Raportit të Progresit të BE-së për këtë vit për Serbinë.

Sipas Mustafit, në raport shprehen mangësitë në rrespektimin e të drejtave të shqiptarëve, sidomos në mospërfshirje në institucione por edhe të drejtat civile, siç është çështja e pasivizimit.

Ndër të tjera, Mustafi ka veçuar edhe moszbatimin e Planeve të Veprimit për minoritete por edhe ngecje në lëminë e arsimit.

Këshilltarit të Bislimit i ka bër përshtypje sidomos faqja e 43-të e Raportit të Progresit për të cilën thekson se është hartuar sikur të kishte një autor shqiptar.

Linku i raportit të Progresit për Serbinë në gjuhën angleze:

https://neighbourhood-enlargement.ec.europa.eu/serbia-report-2024_en

Postimi i Mustafit:

EU Progres :Raporti i Serbisë 2024 dhe të Drejtat e Shqiptarëve në Luginën e Preshevës .
Raporti i publikuar dje i Komisionit Evropian për Serbinë në vitin 2024 thekson sfidat e vazhdueshme në respektimin dhe mbrojtjen e të drejtave të minoriteteve, përfshirë komunitetin shqiptar në Luginën e Preshevës.
Ndonëse ka një kornizë ligjore në përputhje me standardet evropiane, zbatimi i saj mbetet larg pritshmërive.
Disa nga çështjet kryesore të ngritura përfshijnë:
Vonimi i planit të veprimit për të drejtat e minoriteteve – Vonesë e papranueshme që kërkon përfshirjen e rekomandimeve të Këshillit të Evropës dhe zbatimin e tyre pa vonesë.
Kontrollet policore dhe “pasivizimi” i adresave – Shqiptarët e Luginës janë përballur me procedura të paqarta dhe mungesë transparence nga autoritetet.
Mungesa e përfaqësimit të shqiptarëve në institucionet publike dhe polici – Zbatimi i planit të veprimit për përmirësimin e përfaqësimit tonë është thelbësor për një shoqëri të drejtë dhe të barabartë.
Përmirësimi i qasjes në arsim dhe kulturë në gjuhën amtare – Tekstet shkollore në gjuhën shqipe dhe mësimi i gjuhës serbe si gjuhë shtesë mbeten të pamjaftueshme.
Etj.
P. S. Faqen 43 të raportit e kishin shkruar si me i shkru naj shqiptar që lobojke.