Me rastin e përvjetorit të lindjes së Jonuz Musliut, kryetari i Lëvizjes për Demokraci (LPD), Shqiprim Musliu, ka ndarë një mesazh emocional përme
Me rastin e përvjetorit të lindjes së Jonuz Musliut, kryetari i Lëvizjes për Demokraci (LPD), Shqiprim Musliu, ka ndarë një mesazh emocional përmes një statusi, duke kujtuar figurën dhe jetën e babait të tij.
“Bab, kjo është fotografia e fundit që realizove, me buzëqeshjen tënde të përhershme. Sot, në ditëlindjen tënde, të kujtojmë ashtu siç ishe – një burrë i matur, i vendosur dhe i guximshëm përballë padrejtësive”, shkruan Musliu, duke theksuar virtytet njerëzore dhe qëndrimin e palëkundur të Jonuz Musliut ndaj padrejtësive.
Ndërkohë, edhe Lëvizja për Demokraci ka publikuar një njoftim përkujtimor, duke rikujtuar se sot do të ishte ditëlindja e Jonuz Musliut, të cilin e cilëson si “Flakadanin e Pashuar”.
“Sot do të ishte ditëlindja e Jonuz Musliut. Një burrë që jetën e vuri në shërbim të kombit dhe që sakrificën e ktheu në amanet. Edhe pse fizikisht u nda prej nesh, flaka që ai ndezi nuk u shua. Ajo vazhdon të ndriçojë në kujtesën tonë, në qëndresën tonë dhe në përgjegjësinë që kemi për të mos harruar”, thuhet në njoftimin e LPD-së.
Po ashtu, nga kjo lëvizje bëhet e ditur se në ditët në vijim do të mbahen edhe Ditët Përkujtimore për Jonuz Musliun, të cilat organizohen çdo vit si dëshmi se vepra, ideali dhe kontributi i tij vazhdojnë të jetojnë përmes kujtimit kolektiv.
“Nderojmë jetën dhe sakrificën e Jonuz Musliut. Flakadani nuk u shua”, përfundon njoftimi i LPD-së.
Jonuz Musliu ishte i burgosur politik, luftëtar i UÇK-së, kryetar i Këshillit Politik të UÇPMB-së, themelues i LPD-së, kryetar i Kuvendit Komunal të Bujanocit dhe kryetar i Këshillit Kombëtar Shqiptar.
COMMENTS