Vazhdohen mandatet e drejtorëve

Kuvendi Komunal i Bujanocit u ka vazhduar sot mandatet drejtorëve të ndërmarrjeve publike ku për themelues është komuna.

Poashtu, janë aprovuar vendimet mbi taksat komunale dhe administrative, të hyrat dhe shpenzimet e buxhetit deri më 30.09 për vitin 2021, vendimi për shfrytëzimin e pronës publike për vitin 2022, etj.

Nën kryesimin e kryetarit, Enver Ramadani, këshilltarët në rend dite kanë patur edhe ndryshimin e tretë të Planit Rregullativ Gjeneral të Bujanocit.

Të gjitha pikat e rendit të ditës janë miratuar pa ndonjë debat të theksuar.

E vetmja polemikë gjatë seancës së sotme kishte të bënte me vërejtjen e këshilltarit të APN-së, Florim Agaj, i cili shfaqi habinë përse seancat nuk transmetohen edhe përmes internetit.

Edhe në takimin e sotëm të organit legjislativ komunal kanë munguar këshilltarët nga korpusi i partive politike serbe.