Kongresmenët amerikanë në KKSH

Kongresmenët amerikanë Keith Self dhe Suhas Subramanyam po qëndrojnë sot për vizitë në Preshevë, ku janë pritur në zyrat e Këshillit Kombëtar Shqiptar nga kryetari i këtij institucioni, Enkel Rexhepi, së bashku me deputetin Shaip Kamberi dhe bashkëpunëtorë.

Sipas Rexhepit, gjatë takimit janë diskutuar çështjet kryesore me të cilat përballet Lugina e Preshevës prej dekadash, përfshirë pasivizimin e adresave, mosnjohjen e diplomave, mospërfaqësimin në institucione, mungesën e investimeve dhe moszhvillimin ekonomik të komunave me shumicë shqiptare.

Ai ka theksuar se moszbatimi i Planit 7 Pikësh dhe i Planit Aksional për integrimin e shqiptarëve në institucionet shtetërore, si dhe moshapja e kufirit Miratoc–Llojan, janë dëshmi të një qasjeje diskriminuese ndaj shqiptarëve në Luginë.

Në takim ishte e pranishme edhe Teuta Fazliu, e cila sipas Rexhepit ka paraqitur para kongresmenëve rastin e saj të pasivizimit të adresës, çështje që ajo e ka dërguar deri në Gjykatën e Strasburgut.

Kryetari i KKSH-së ka vlerësuar si shumë të rëndësishëm projektligjin e kongresmenit Keith Self, i cili sipas tij ka marrë mbështetje nga të dy kampet politike në SHBA dhe shihet si një mundësi për rritjen e presionit ndërkombëtar ndaj Serbisë lidhur me respektimin e të drejtave të shqiptarëve në Luginën e Preshevës.

Rexhepi ka falënderuar kongresmenët amerikanë për vizitën dhe mbështetjen, duke theksuar se shqiptarët e Luginës mbeten ndër komunitetet më proamerikane në rajon.