Zgjedhja e REM – it, proces i rregullt apo kontestues?

Deputetët e Kuvendit Popullor të Serbisë kanë zgjedhur tetë anëtarë të Këshillit të Trupit Rregullator për Mediat Elektronike (REM), ndërsa anëtari i nëntë, i propozuar nga këshillat kombëtare të pakicave kombëtare, nuk është zgjedhur.

Në përbërjen e re të Këshillit të REM-it janë zgjedhur:

• Stevica Smederevac, i propozuar nga Avokati i Popullit, Komisioneri për Mbrojtjen e Barazisë dhe Komisioneri për Informacione me Rëndësi Publike dhe Mbrojtjen e të Dhënave Personale.
• Milan Petković, në propozim të universiteteve të akredituara në Serbi.
• Miloš Garić, i propozuar nga shoqatat e botuesve të mediave elektronike.
• Mileva Malešić, e propozuar nga shoqatat e gazetarëve.
• Ira Prodanov Krajišnik, e propozuar nga shoqatat e artistëve filmikë, skenikë dhe dramatikë, si dhe nga shoqatat e kompozitorëve.
• Rodoljub Šabić, në propozim të shoqatave që kanë për qëllim realizimin e lirisë së shprehjes.
• Dubravka Valić Nedeljković, e propozuar nga shoqatat që merren me mbrojtjen e fëmijëve.
• Snežana Miljković, e propozuar nga kisha dhe bashkësitë fetare.

Asnjë nga kandidatët e propozuar nga këshillat kombëtare të pakicave kombëtare, përfshirë Këshillin Kombëtar Shqiptar, nuk mori mbështetjen e nevojshme parlamentare.

Kohëzgjatja e mandateve të anëtarëve të zgjedhur u përcaktua me short:

• Dyvjeçare për përfaqësuesit e universiteteve, institucioneve të pavarura dhe shoqatave të botuesve të mediave elektronike.
• Katërvjeçare për ata të propozuar nga shoqatat që merren me lirinë e shprehjes, këshillat kombëtare të pakicave dhe shoqatat e gazetarëve.
• Gjashtëvjeçare për përfaqësuesit e shoqatave të kompozitorëve dhe artistëve dramatikë, skenikë e filmikë, organizatat për mbrojtjen e fëmijëve dhe bashkësitë fetare.
• 
• Reagimi i Këshillit Kombëtar Shqiptar

Kryetari i Këshillit Kombëtar Shqiptar (KKSH), Enkel Rexhepi, reagoi ashpër ndaj këtij vendimi, duke e cilësuar si një dëshmi të qartë të diskriminimit institucional ndaj pakicave kombëtare.

“Ky votim tregon se për qeverinë ksenofobe aktuale, as shqiptari, as boshnjaku nuk janë të pranueshëm. Refuzimi i kandidatëve të pakicave është shkelje e frymës së ligjit për Këshillat Kombëtare të Pakicave Kombëtare dhe tregon mungesë të plotë vullneti për përfaqësim të barabartë,” – deklaroi Rexhepi.

Ai theksoi se REM është një ndër institucionet më të politizuara, që në vend se të garantojë lirinë e mediave, është shndërruar në instrument të kontrollit qeveritar.

“Nëpër mediat që mbikëqyren prej REM-it, shqiptarët vazhdojnë të portretizohen në mënyrën më negative, ndërsa gjuha e urrejtjes ndaj pakicave, veçanërisht ndaj shqiptarëve, nuk sanksionohet. Përjashtimi i përfaqësuesve të pakicave nga ky organ nënkupton heshtje të qëllimshme ndaj diskriminimit mediatik,” – shtoi ai.

KKSH e dënon ashpër këtë praktikë përjashtuese dhe e cilëson si një hap prapa në rrugën e Serbisë drejt standardeve evropiane të barazisë dhe pluralizmit në media.

Reagimi i Bashkimit Evropian

Ndërkohë, shefi i Delegacionit të Bashkimit Evropian në Serbi, Andreas von Beckerath, përshëndeti zgjedhjen e tetë anëtarëve të rinj të REM-it, por paralajmëroi se BE-ja do të ndjekë me kujdes mënyrën e funksionimit të këtij organi.

“Kur Këshilli i REM-it të fillojë punën, presim që të zbatojë plotësisht kompetencat e tij në përputhje me ligjin dhe standardet profesionale. Implementimi do të jetë thelbësor dhe BE-ja do ta ndjekë me vëmendje këtë proces,” – deklaroi Beckerath.